Home
mercoled 27 gennaio 2021
 
 
 
ANCONA TARDE = 2 A 1STE FACEVE NU BELLE SUENNE PDF Stampa E-mail
L'ha scritt Aldo "Diecipalazzine"   
luned 09 giugno 2008
 Catà! Catàààààà! Uezéte ca a scè a fatijà! Sì de prime turne osce; manisciate ca face tarde! Méne bbelle mène!… Aspitte Marì! Stè facéve ‘nu belle suènne. Ce te stè sunnave qualche frusckulona ? Ognettande te sendéve sckamà accom’ a ‘nu jattùdde. 
None Marì ! Cè feméne e feméne… abbunesinne me stè sunnave ca ‘u Tarde nuèstre se stè sciucàve ‘a finale pe ‘nghianare in serie B e vingèmme. Matòò Marì aviva vedèèèèè… stave ‘a cittade totta pettate de  bandiere rosse e blu, palazze, strade, chiazze rosse e blu… pure ‘a munnezze ca stave ndèrre eve rosse e blu. E po’, Marì quanne ‘u Tarde ha segnàte m’hagghje menate de cape indr’a fundane de Chiazze Ebaglie, Marììì redéve e chiangéve… chiangéve e redéve. 
Mène carnevale! Muevéte ca è tarde…Tune hè pèrse ‘a cape pe stù cazze de pallone… tutte le dumeneche scappe e fusce, no nne face pigghjà rigitte. ‘A mezzadje piatte pronde e te gnutte tutte quidde bene de Ddije arraggjate arraggjate, te viste accome ‘a n u purecenelle rosse e blu, te futte ‘na treqquarte de Raffe e te ne fuce…e baste mòòòò! Ma ce tténe stu pallone, ‘u zucchére? Seee Marìììì… ’u Tarde nuèstre jè… accome te pozze spiegà? Nonge jè sule ‘na partite… jè ‘na tradizzione. Pe tte spiegà megghje… accome alle Mistere, ‘a ‘Ndulurate, ‘a prucessione de Sande Catavéte… ’na cose ca ‘nuje, maschele de Tàrde, ame avùte dall’attane nuèstre. ‘A ccasa meje quiste evéne le cose ‘mbortande… ’a fatije, ‘a varchetedde, le cozze, le tradizziune religiose… e ‘u Tarde. ‘A dumenéche po’ scéve a messe cu Mammà, Papà s’accattave ‘u giurnale, annucéve le cozze, pigghjave doje pastaredde fresche, mangiamme le chiangarelle c’u sughe, le pulpijtte e po’ me dàve a mane e me purtave o cambe… Papà mije…. Naaa Ce stè fface mòòòò? Stè cchiange? Ce jè? Nijnde Marììì, nijnde, ‘u fatte jè ca attaneme, qunne murì, me dicì… figghje mije vogghje ca tu stè bbuene e ca quanne ‘a dumeneche scioche ‘u Tarde t’azzettà o stèsse poste addò ne zzettamme nuije assieme ‘o nonne tue… ma n’otra cose t’hagghj’a dicére… ce turname in serie B… famme ‘nu piacere… pigghje doje fiure, une russe e n’otre blu e puertemele ! Mène mo Catà ca face tarde a fatije… ma famme capì ! Accome ‘a sciute a ffinì st’anne ‘u cambionate? Nijnde Marììì, com’a sciute a ffinì? Le fiure… ponne aspettà pure pe st’anne! E mmò famme scè menà indr’a quedda fetenzije d’u Sidellurgeche… tande aqquà putìme sule sunnà!
Ultimo aggiornamento ( domenica 15 giugno 2008 )
 
< Vid quidd d'apprim.   Vid 'nnotre. >
Cr'stian online:
Get Firefox!
Ce timb st face?
Tardnuestr
---
Scanzavirus Avast!
avast! Home

 
Top! Top!