tarantonostra.com - TARDE – PESCARA = 1 A 1.. MA IND’A CCASE NONGE VINGIME!... E CE STE’ ‘A DIOSSINE?

TARDE – PESCARA = 1 A 1.. MA IND’A CCASE NONGE VINGIME!... E CE STE’ ‘A DIOSSINE?

L'ha scritt Aldo "Diecipalazzine"
domenica 05 ottobre 2008
‘No riuscìme a vengére ‘na partite ind’a ccàse. Secondo mè jè còlpe d’u càmbe. Stè ‘a diossìne e ‘u policlorobifenile. Ce uardàte ‘u terréne d’u Iacovòne pàre ca ha succèsse qualcheccose brùtta… fa ca mò l’hònne bombardate. Presedèèèèèèè chiàme all’Arpa… ce ccòse hè capìte? Nòne ‘u strumènte… quìdde cristiàne ca mesuràne l’inguinamendo sìne. Ce jèèè? Te pigghje paùre ca fànne accòme alle pechére de Statte? Ca t’accidéne tùtte le sciucatùre? Vìde ca n’affàre fàce piccè ‘a Tàrde ce t’accidéne lòre come a ‘na pechére te pajéne, ce muère sùle accome ‘a ‘nu càne, a diossine ‘no cendre nijnde… Ce stè ddìce? Pùre tu te pigghje paùre de Riva? Nòòòòne Riva ca sciucàve ind’u Cagliare quìdde d’a fabbrèche d’a mòrte sìne. Bah… osce ‘u Tarde ind’u prìme tijmbe ha fàtte sckife sckife sckife e ha pigghjate ‘nu gòl da fèsse accòme a dumenèca passàte… grazzie ‘a defèse. Po’ ‘u Tarde ha sciucàte c’u 4-4-2 piccè stàve MAROLDA ‘mbéce de CAZZOLA (ca s’ha fàtte màle) e ind’u seconde tijmbe ha fàtte ‘na bella partite. Ha segnate DIONIGI ca s’ha levàte n’otra vòte ‘a magliètte pe ffà vedè quédde de sòtte ca stè scritte: GESU’ E’ IN ME e dumenéche nonge sciòche secùre. Ije le facéve ‘na bella multe a quìdde carnevale piccè tre ggol ha fàtte e tre ammonizione ha pigghjàte po’ vedémme ce l’avèva pajà ‘a mùlte, idde o Gesù? Po’ ‘u Tàrde s’ha mangiàte ‘nu gol cu MAROLDA ca ‘u segnàve pùre ‘nu cecàte de nòtte e n’otre cu DIONIGI.Hònne trasùte CARROZZA e DI BARI ma sèmpre accussì ha fenìte ‘a partite.Comungue sta squadra nostre sègne sùle grazzie alle punizziòne, oscè ‘u gòl ha parturìte da ‘na punizziòne de PASTORE (‘u capitàne nuèstre)… A propòòòòò PASTORE ca stàve ‘nu pìcche preoccupate piccè avève sendùte ‘u fàtte d’a diossìne e delle pechère, quànne ha sapùte ca sùle le pechère moréne e le cristiane nòne (accussì dicène ‘a Tàrde)…ha penzàte…tante ije so’ pastòre, ce me ne fùtte a mmè d’a diossìneeeeeee…annèseeeeeee. Beh facitava calà mò, e ‘no ve pigghjàte pavùre d’a diossine… mangiatève ‘u pèsce ehehehe, ca cu tùtte ‘u mercùrje ca stè indre ve putìte mesurà ‘a frève senza termomètre… e Riva sciucàve ind’u Cagliare sìne sìne.

< Vid quidd d'apprim.		Vid 'nnotre. >

[Và ret]