Ce sciurnateeee... a mare tutte parlavene d’abbonamende. Ci n’aveve accattate doje o trete pe le figghie. Ci l’aveve accattate e no’nge l’avev’avute e ci no sapeve ce puteve purtà pure le piccinne… ’nu ruete inzomme! Ce organizzazzioooooneeeeee! ‘A curve jeve chiena chiena e quanne ha trasute ‘a squadre ha state ‘na feste. Stavene pure le frate de Iacovone in tribune, ca s’honne emozionate. Stave 50% de Presedenze. Sule D’Addarie. Lu Presidende Blasi, stè angore in ferie.’U purtiere d’u Marcianise s’aveve vestute fa ca mo stave a mare, accome a ‘nu bagnine cu le calzettone, le uande e le scarpe… eheheh…

U nuestre ‘mbece ha fatte tre o quattre parate ca s’ha apierte le valvele. Menumaaaaaaleee! E ssine! Piccè ind’u prime tiembe ha squadre pareve ‘na squadre de liune,o seconde de……….. L’arbetre… grattateveeeeeee!…. s’ha mise ‘na maglietta viole e ‘nu cazone gnure ca pareve ‘nu malaurije. BRAGLIA n’otre picche se mangiave ‘u segnalinee piccè azave sempre ‘a bandierine, nemmanghe ce stave alla GIRANDOLA ehehehe! Ha state espulse MUROLO… e ‘a musiche ha cangiate. Avite capite ‘a battute? MUROLO – MUSECHE? Nonge l’avite capite me! Ehehehe. No fasce niende! Comungue pareve ca quidde tenevene ‘nu sciucatore in chiù, ca in mene. CORONA, ‘u Rreje, s’ha gnuttute ‘nu gol granne quante ‘a ‘na case ma po ha fatte ‘nu bell’ gol, e ‘u Iacovone ha scuffulate. Fasceve ‘nu cavete ca manghe le cane e le crestiane se scuagghiavene…Quidde ca stave azzettate affianghe a mmeje a ‘nu certe punde no l’hagghje viste cchiù… s’aveve scuagghiate! Ehehehe… MEZZAVILLA n’otre picche fasceve ‘u uaje piccè ha scettate ‘nderre in area ‘nu sciucatore de l’otra squadre. Honne trasute IMPARATO, BERRETTI  e FALCONIERI ‘u bomber nueve. FELCI  ha sciucate buene suse a fasce ma nonge ‘ngarre ‘nu cross. IMPARATO ‘mbece fa ca mo jè ‘nu cinghiale, no’nge ‘u ferme nemmanghe ‘na scariche de pallettone, sule ca s’embrogghie da sule e se ne vè ‘nderre. SCARPA ha fatte ‘na bella partite, ma a stu Tarde nuestre manghe qualcheccose… Bah! Ce manghe? Beh fascitele ‘na flebe appedune, ca angore adda accumenzà ‘u cambionate e già no s’a fidene cchiù! Ehehehe! Facitava calà!